ໃນຕອນເຊົ້າ ຂອງວັນອັງຄານ ວັນທີ 13 ກັນຍາ 2022 ເວລາ 08:00 ທີ່ຫ້ອງປະຊຸມຊັ້ນ 3 ຂອງພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ  ໄດ້ເປີດກອງປະຊຸມຝຶກອົບຮົມວຽກງານບັນຊີແຫ່ງລັດ( ລະບົບບັນຊີຄູ່ ) ໃຫ້ພະນັກງານວິຊາການ ພະແນກ ຊັບພະຍາກອນທຳມະຊາດ

ແລະ ສິ່ງແວດລ້ອມ ນະຄອນຫຼວງວຽງຈັນ ແລະ ພະນັກງານວິຊາການ ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ 9 ເມືອງ  ພາຍໃຕ້ການເປັນປະທານ ຂອງ ທ່ານ ບຸນຊົມ ຊົງວິໄລ ກຳມະການພັກ ນະຄອນຫຼວງວຽງຈັນ, ເລຂາຄະນະພັກຮາກຖານ, ຫົວໜ້າ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ, ມີຫົວໜ້າ ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ  ແລະ ນັກສໍາມະນາກອນ 9 ຕົວເມືອງ ພ້ອມດ້ວຍຄູຝຶກຈາກ ພະແນກການເງິນນະຄອນຫຼວງວຽງຈັນເຂົ້າຮ່ວມ.

 ໃນພິທີເປີດກອງປະຊຸມໃນຄັ້ງນີ້  ໄດ້ຮັບຟັງການໂອ້ລົມຂອງ ທ່ານ ບຸນຊົມ ຊົງວິໄລ ກຳມະການພັກ ນະຄອນຫຼວງວຽງຈັນ, ເລຂາຄະນະພັກຮາກຖານ, ຫົວໜ້າ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນກ່ຽວກັບຄວາມໝາຍຄວາມສຳຄັນຂອງວຽກງານບັນຊີ. ພ້ອມດຽວກັນນີ້ກໍ່ຍັງໄດ້ໃຫ້ນັກສຳມະນາກອນທີ່ເຂົ້າຮ່ວມໃນຄັ້ງນີ້ຈົ່ງເອົາໃຈໃສ່ຕິດຕາມ, ຍາດແຍ່ງເອົາບົດຮຽນຈາກຄູຝຶກເພື່ອເອົາໄປນຳໃຊ້ເຂົ້າໃນວຽກງານຂອງຕົນ. ຄູ່ມືທີ່ນຳມາຝຶກອົບຮົມໃນຄັ້ງນີ້ປະກອບມີ: ໃບດຸ່ນດ່ຽງກ່ອນການກວດນັບ, ປຶ້ມບັນຊີປະຈຳວັນ ສຳຮອງຕິດຕາມບົດລົງບັນຊີ, ປຶ້ມບັນຊີປະຈຳວັນພາກ 62 , ປຶ້ມບັນຊີປະຈຳວັນຕິດຕາມລາຍການອື່ນໆ, ປຶ້ມບັນຊີປະຈຳວັນການຮັບເງິນ, ປຶ້ມບັນຊີປະຈຳວັນລາຍຈ່າຍເງິນ, ປຶ້ມບັນຊີປະຈຳວັນທົ່ວໄປ ( ເງິນສົດ ), ປຶ້ມບັນຊີປະຈຳວັນທົ່ວໄປ ( ເງິນຝາກ ) ປຶ້ມບັນຊີປະຈຳວັນຕິດຕາມລາຍຮັບວິຊາການ ( ຄ່າບໍລິການ ) ແລະ ຕາຕະລາງສັງລວມປຶ້ມບັນຊີປະຈຳວັນ. ກອງປະຊຸມໄດ້ດຳເນີນເປັນເວລາ 03 ວັນ ນັບແຕ່ວັນທີ 13-15 ກັນຍາ 2022.